Раніцай, 30 лістапада, Папа Рымскі Леў XIV прыняў удзел ва ўрачыстай літургіі ў патрыяршай царкве святога Георгія ў Стамбуле. Набажэнства ўзначаліў Патрыярх Канстанцінопальскі Барталамей І. Папа маліўся разам з духавенствам і вернікамі, а потым звярнуўся да іх з прамовай:
«Каб заставацца вернымі жаданню Бога, каб мы клапаціліся не толькі пра братоў і сясцёр у веры, але і пра ўсё чалавецтва і ўсё створанае, нашы цэрквы павінны разам адказваць на выклікі Духа Святога. Перш за ўсё цяпер, у час крывавых канфліктаў блізка і далёка ад нас, католікі і праваслаўныя пакліканы быць будаўнікамі міру», — сказаў біскуп Рыму.
Патрыярх Канстанцінопалскі Барталамей І, які ўзначальваў набажэнства, падкрэсліў, што ў апошнія дзесяцігоддзі экуменічны дыялог умацоўваў братэрства, давер і ўзаемнае разуменне:
«Дыялог дазволіў нашым цэрквам у гэты крытычны момант гісторыі заняцца цяжкасцямі мінулага. Дыялог распачаў шлях да іх пераадолення і прывядзе нас да аднаўлення поўнай камуніі».
Іерархі падкрэслілі, што сумесная малітва прайшла ў дзень святога апостала Андрэя Першазванага — апекуна Патрыярхату і сімвала адзінства хрысціян. Пасля Стамбула Папа Рымскі Леў XIV адпраўляецца ў Ліван.
iar/эж